හෝකන්දර ගුවන්යානා අනතුරෙන් 4ක් මියයයි . (වීඩියෝ දර්ශන සහිතයි.)

අතුරුගිරිය - හෝකන්දර ප‍්‍රදේශයට ශ‍්‍රී ලංකා ගුවන් හමුදාවට අයත් ඒ.එන් 32 වර්ගයේ ගුවන් යානයක් අද (12) උදෑසන කඩා වැටීමට පැවති කාලගුණ තත්ත්වයන් බලපාන්නට ඇතැයි විශ්වාස කරන බව ගුවන් හමුදා ප‍්‍රකාශක වින් කමාන්ඩර් ගිහාන් සෙනෙවිරත්න සඳහන් කළා. හෝකන්දර - කැතරින් පාර්ක් නිවාස සංකීර්ණය අසල රබර් වත්තකට අද උදෑසන 6.20 ට පමණ එම ගුවන් යානය කඩා වැටුණු අතර යානයේ සිටි නියමුවන් ඇතුළු 4 දෙනෙකු ජීවිතක්ෂයට පත්වුණා. තවත් අයෙකු දැඩි පිලිස්සුම් තුවාල සහිතව මේ වනවිට ජාතික රෝහලේ ප‍්‍රතිකාර ලබනවා. යානය කටුනායක ගුවන් හමුදා කඳවුරේ ගුවන් පථයෙන් අද උදෑසන 06.10 ට පමණ පිටත්වී ඇත.
පසුව, රත්මලාන බලා ගමන් ගත් යානයේ සන්නිවේදන හිටි හැටියේ නතර වූ බව ගුවන් හමුදා මාධ්‍ය ප‍්‍රකාශකවරයා සඳහන් කළා. නියමුවා අවසන් වරට ලබාදුන් සන්නිවේදනයෙන් ප‍්‍රකාශ වී ඇත්තේ ඉදිරි ගුවන් පථය පැහැදිලි නොමැති බව සහ මීදුමෙන් වැසී ඇති බවයි. ඒ.එන්.32 වර්ගයේ මෙම ගුවන් යානයේ පුද්ගලයන් 40 දෙනෙකුට ගමන් කළ හැකි අතර අනතුර සිදුවන අවස්ථාවේ එහි ගමන් කර ඇත්තේ නියමුවන් දෙදෙනෙකු සහ ගුවන් හමුදා නිලධාරින් 3 දෙනෙකු පමණයි. යානය කඩා වැටීමත් සමඟ ගින්නක් හට ගත් අතර, නිවාස 3 කට ද අලාභ හානි සිදුවුණා. ගින්න මේ වනවිට මැඩපවත්වා තිබෙනවා.

අනතුර සිදුවූ අවස්ථාව හිරු නිව්ස් වාර්තා කල වීඩියෝ දර්ශන මතින් බලන්න.