දීප්තිමත්ම වල්ගාතරුව 2013 නොවැම්බර් සහ දෙසැම්බර් මාස වලදී
21 වැනි සියවසේ දක්නට ලැබෙන දීප්තිමත්ම වල්ගාතරුව 2013 නොවැම්බර් සහ
දෙසැම්බර් මාස වලදී අහසේ පායනු ඇතැයි රුසියාවේ තාරකා විද්‍යාඥයෝ පවසති.
අයිසොන් නමින් හඳුන්වා ඇති මේ වල්ගාතරුව දිවා කාලයේදී ද පෙනෙන බව ඔවුහු
කියති.
සෞරග්‍රහ මණ්ඩලය ඇතුලතින් ගමන් ගන්නා අයිසොන් වල්ගාතරුව සූර්යයාගේ ගුරුත්වාකර්ශනයට හසුවී එහි ඇදී ගොස් විනාශ වනු ඇතැයි ද තාරකා විද්‍යාඥයෝ පවසති.
රුසියාවේ ඇති අන්තර්ජාතික විද්‍යාත්මක ප්‍රකාශ ජාලය නමින් හඳුන්වන දුරේක්ෂ පද්ධතියට අයත් එක් දුරේක්ෂයකින් කරන ලද නිරීක්ෂණයකි මෙම වල්ගතරුව හඳුනාගෙන ඇත. අයිසොන් යනු එම දුරේක්ෂ ජාලයේ ඉංග්‍රීසි නමේ මුල් අකුරු හතර එකතු කළ විට හඳුන්වන කෙටි නාමයයි.
තාරකා විද්‍යාඥ ආචාර්ය ඩේවිඩ් වයිට් පවසන්නේ මෙම වල්ගාතරුව සෞරග්‍රහ මණ්ඩලයේ පිටත පිහිටි ඌට් වළාවේ හිම සහිත සුන්බුන් වලින් සෑදී ඇති බවයි.
ඔහු වැඩිදුරටත් මෙසේ ද පවසයි.
‘‘ අපි විශ්වාස කරනවා මේ වල්ගතරුව හිරුගේ ගුරුත්වාකර්ශනයට හසුවී විනාශ වී යතැයි කියා. ඒ ආකාරයෙන් වල්ගාතරුව විනාශ නොවුනහොත් එය නැවත සෞරග්‍රහ මණ්ඩලය දෙසට එනු ඇත්තේ තවත් වසර දහස් ගණනකට පසුව. වල්ගාතරුව හිරුට තව තවත් සමීප වීමත් සමගම එහි ඇති හිම දියවී එය වායු වළාවක් බවට පත්වනවා. හිරුට ආසන්න වීමේදී එය දීප්තියෙන් බැබලීම නිසා පියවි ඇසින් බැලීම හානිකර විය හැකියි.
පෘතිවියේ උතුරු අර්ධ ගෝලයේ පිහිටි රටවලට හොඳින් දර්ශනය වන මේ වල්ගාතරුව හේතුවෙන් නොවැම්බර් අවසානයේ සහ දෙසැම්බර් අහස විචිත්‍රවත් වනු ඇතැයි තාරකා විද්‍යාඥයන්ගේ විශ්වාසයයි. ඔවුන් පවසන්නේ වලගාතරුව රාත්‍රියේදී සඳට වඩා දීප්තිමත් වනු ඇති බවයි.
